2026 елның 23 мартыннан 3 апреленә кадәр Татарстан Республикасы Мәгарифне үстерү институтында республиканың мәгариф оешмалары директорларының уку эшләре буенча урынбасарлары өчен «Белем бирү сыйфаты белән идарә итүдә инновацияләр: белем бирү уңышсызлыгын җиңүнең һәм потенциалны ачуның заманча практикалары» дигән өстәмә һөнәри квалификация күтәрү программасы уңышлы гамәлгә ашырылды. Курс күләме 72 сәгать тәшкил итте.
Уку кысаларында укучыларның академик уңышын яхшырту буенча педагогларның һөнәри үсеше белән идарә итүгә заманча алымнар, норматив-хокукый тәэмин итү мәсьәләләре, потенциалны үстерүнең төп юнәлешләрен гамәлгә ашыру һәм белем бирүдә уңышсызлыкны җиңеп чыгу инструментлары каралды.
Лекция-гамәли дәресләр педагогика һәм мәгариф идарәсе кафедрасы укытучылары һәм Татарстан Республикасы Мәгариф һәм фән министрлыгы хезмәткәрләре тарафыннан оештырылды.
2026 елның 30 мартында программада катнашучылар Татарстан Республикасы Мәгариф һәм фән министры Илсур Һадиуллин белән очраштылар. Тере аралашу форматында директор урынбасарлары белем бирү сыйфаты белән идарә итүнең актуаль мәсьәләләре турында фикер алыштылар, тәҗрибә һәм инициативалар белән уртаклаштылар. Министр тыңлаучыларга һөнәри эшчәнлекләрендә уңышлар, иҗади илһам һәм алга таба үсеш теләде.
Уку чорында мәктәп җитәкчеләре урынбасарлары Казан шәһәре Авиатөзелеш районының 119 нчы урта гомуми белем мәктәбе базасында «Укучыларның белем бирү нәтиҗәләренең сыйфатын күтәрү: проблемалар, эзләнүләр, табышлар» темасына көндезге стажировка үттеләр (директоры Т.П. Фадеева), шулай ук Казан федераль университеты һәм Казан ачык талантлар университеты 2.0 укытучыларыннан гамәли юнәлешле дәресләрдә катнаштылар.
Укытуның йомгаклау этабында идарәчеләр программаның эчтәлегенә бәйле актуаль темалар буенча йомгаклау эшләрен (кейсларны) уңышлы якладылар.
Уку йомгаклары буенча тыңлаучылар курсларның югары дәрәҗәдә оештырылуын, тәкъдим ителгән тематиканың актуальлеген, программаның гамәли юнәлешле булуын билгеләп үттеләр һәм үзләштергән белемнәрен үзләренең һөнәри эшчәнлекләрендә кулланырга әзер булуларын белдерделәр.
