Бүген Түбән Кама шәһәренең 35 нче номерлы лицеенда «Хәзерге дөньяда нәтиҗәле табигый-фәнни белем бирү модельләре» темасына «Физик-математик алгарыш» республика проектын гамәлгә ашыру кысаларында иң яхшы тәҗрибәләрне өйрәнү буенча республика семинары булды.
Семинар эшендә Түбән Кама, Әлмәт, Бөгелмә, Зәй, Алабуга, Лениногорск, Менделеевск, Минзәлә муниципаль районнарыннан, шулай ук Яр Чаллы шәһәреннән гомуми белем бирү оешмалары җитәкчеләре, математика, физика һәм информатика укытучылары, мәгълүмати-методик бүлек җитәкчеләре һәм методистлар катнашты.
Чара барышында «Мәктәптә физмат- алгарыш» грант проектын гамәлгә ашыруның методик аспектлары һәм практик нәтиҗәләре турында фикер алыштылар. Прогрессив педагогик яңалыкларны популярлаштыруга, шулай ук математика, физика һәм информатиканы тикшеренү һәм уен эшчәнлеге аша интеграцияләүгә аерым игътибар бирелде.
Семинарның программасы бай һәм күптөрле булды: ачык дәресләр, мастер-класслар, интеллектуаль уеннар һәм ачык диалоглар катнашучыларга тәҗрибә уртаклашырга, заманча белем бирүнең актуаль мәсьәләләре турында фикер алышырга һәм табигый‑фәнни дисциплиналарны укытуның нәтиҗәле практикалары белән танышырга мөмкинлек бирде.
Алынган тәҗрибә һәм яңа идеяләр киләчәктә физика-математика белемен үстерү өчен файдалы булыр һәм педагогларны яңа һөнәри казанышларга рухландырыр дип өметләнәбез.
