27 февральдә Буа шәһәренең 2 нче лицее базасында «Остазлык: белем бирү сыйфатын арттыру өчен теория һәм практика» республика семинары кысаларында 2024 елда «Үсеш ноктасы» белем бирү үзәкләре оештырылган Татарстан гомуми белем бирү оешмаларының идарә командалары өчен «Инженерлык белемен гамәлгә ашыру өчен ресурс буларак челтәрле хезмәттәшлек» түгәрәк өстәле узды.
Татарстан Республикасы Әтнә, Югары Ослан, Кайбыч, Тәтеш, Чүпрәле, Яшел Үзән районнарының мәгариф бүлекләре башлыклары урынбасарлары түгәрәк өстәлдә мәктәпләрнең өстәмә белем бирү учреждениеләре, көллиятләр, югары белем бирү учреждениеләре һәм предприятиеләр белән челтәрле элемтәләренең төп юнәлешләре турында фикер алыштылар. «Үсеш ноктасы» үзәкләрендә төп һәм өстәмә программаларны гамәлгә ашырганда челтәр багланышларының өстенлекләре турында Кама Тамагы районы мәгариф идарәсе башлыгы Елена Гыймадиева сөйләде.
Буа районының гомуми белем бирү оешмаларында «Үсеш ноктасы» мәгариф үзәкләренең эшен нәтиҗәле оештыру тәҗрибәсе белән мәгариф идарәсе җитәкчесе Наталья Македонская, шулай ук лицей директоры Людмила Абрамова уртаклашты. Табигый-фәнни белем бирүне үстерүгә юнәлдерелгән иң яхшы тәҗрибәләрне Буа районының «Үсеш ноктасы» мәгариф үзәкләре педагоглары тәкъдим итте.
Семинарда катнашучылар игътибарына инженерлык фикерләвен үстерү буенча интерактив мәйданчыклар күрсәтелде. «Яшь укытучы – Остаз», «Укучы – Укытучы», «Укучы – Укучы», «Укучы – Һөнәри белем бирү оешмасы студенты», «Укучы – Эш бирүче» юнәлешләрендә остазлыкның иң яхшы практикалары күрсәтелде.
Татарстан Республикасы Мәгарифне үстерү институты Фәнни һәм инновацион эшчәнлек буенча проректоры Лариса Шәмсетдинова нәтиҗәле проект эшчәнлеген оештыру темасына җентекләп тукталды.
Бөек Ватан сугышында Җиңүнең 80 еллыгына багышланган «Б. Васильевның «А зори здесь тихие» повесте буенча әдәби квартирник» дәрестән тыш чарасы семинарда катнашучыларның барысында да тәэсир калдырды.
