Татарстанда 5-11 сыйныф укучылары өчен берьюлы ике белем бирү проекты старт ала, «Физик-математик алгарыш» һәм «Физик-химик алгарыш», аларның кысаларында 400 укучы акчалата бүләк алачак. Проектлар «Яшьләр һәм балалар» илкүләм проектының «Иң яхшысы балаларга» һәм «Һәр баланың уңышы» федераль проектларының максатларына һәм бурычларына туры килә һәм укучыларның фәнни потенциалын үстерүгә, аларда табигый-фәнни дисциплиналар өлкәсендә тикшеренү фикерләвен һәм гамәли күнекмәләрен формалаштыруга һәм киләчәктә белем алуга, һөнәри үсешкә югары мотивацияне саклауга юнәлдерелгән.
Проектлар Татарстан Республикасы Мәгариф һәм фән министрлыгы тарафыннан гамәлгә ашырыла. Аларның максаты – физика, математика, информатика, химия һәм биологияне тирәнтен өйрәнүче, киләчәктә табигый-фәнни һәм математика юнәлешләре буенча укырга керергә планлаштыручы, шулай ук конкурсларда актив катнашучы укучыларга ярдәм итү.
«Физмат алгарыш» – физика, математика һәм информатикада үз сәләтләрен үстерүче мәктәп укучылары өчен конкурс. Бүләк суммасы: 50 000 сум. Казанышлардан чыгып, иң күп балл җыйган 200 катнашучы җиңүче булачак. Җиңүчеләр түбәндәгечә бүленә: 5-6 сыйныфлар – 60 кеше, 7 сыйныфлар – 30 кеше, 8-11 сыйныфлар – 110 кеше. Катнашу критерийлары турында сайттан укып белергә мөмкин: https://events.utalents.ru/contest/fizmatpremia
«Физхимбио алгарыш» – физика, химия яки биология белән кызыксынучы укучылар өчен проект. Проектның һәр җиңүчесе өчен бүләкләү суммасы 60 000 сум тәшкил итә. Иң күп балл җыйган 200 катнашучы җиңүче булачак: 5-6 сыйныфлар – 50 кеше, 7 сыйныфлар – 30 кеше, 8-11 сыйныфлар – 120 кеше. Төгәлрәк мәгълүмат сайтта урнаштырылган: https://events.utalents.ru/contest/fizhimbiopremia
Һәр проектта иң күп балл җыйган катнашучылар җиңәчәк. Сайлап алу конкурс нигезендә үтәчәк. Аны Татарстан Республикасы Мәгариф һәм фән министрлыгы тарафыннан расланган эксперт конкурс комиссиясе үткәрә. Бәяләү критерийлары конкурслар турындагы боерыкларда һәм нигезләмәләрдә күрсәтелгән.
Ике проектка да теркәлү 1 апрельдән 15 апрельгә кадәр 18:00 сәгатькә кадәр проектлар сайтларында үткәреләчәк. Катнашу өчен «Физмат алгарыш» һәм «Физхимбио алгарыш» проектлары предметлары буенча гариза җибәрергә һәм актуаль казанышларны йөкләргә кирәк. Конкурска һәм катнашучының сыйныфына карап түбәндәге чаралардагы казанышлар исәпкә алына:
- Бөтенроссия укучылар олимпиадасы;
- РФ Мәгариф министрлыгы һәм Мәгариф һәм фән министрлыгы исемлегендә булган олимпиадалар һәм конкурслар;
- Физика, математика, информатика өлкәсендә интеллектуаль эшчәнлек нәтиҗәләре (дөнья күргән мәкаләләр, патентлар);
- Республика, муниципаль һәм мәктәп конкурслары, фәнни конференцияләр, профильле сменалар;
- Социаль һәм агарту активлыгы.
ТР Мәгариф һәм фән министрлыгы матбугат хезмәте материаллары буенча
