ТР Мәгариф министрлыгының Иҗтимагый советы 2025 елның беренче яртыеллыгына йомгак ясады
Татарстан Республикасы Мәгариф һәм фән министрлыгында 2025 елның 1 яртыеллыгында ачык формалаштырылган максатларны һәм бурычларны гамәлгә ашыру йомгаклары буенча Иҗтимагый совет утырышы үткәрелде.
Утырыш эшлекле мохиттә узды. Беренче мәсьәлә Иҗтимагый совет составын 18 кешегә кадәр киңәйтү булды. Совет әгъзалары РФ Ислам мәгарифе советы директоры һәм ТР мөфтиенең мәгариф буенча урынбасары Рәфыйк Мөхәммәтшин, Казан епархиясенең дини белем һәм катехизация бүлеге рәисе Александр Данилов һәм ТР Яшьләр хөкүмәте рәисенең мәгариф һәм фән мәсьәләләре буенча киңәшчесе Дамир Миңнеханов булды.
ТР Мәгариф һәм фән министрлыгы каршындагы Иҗтимагый совет узган елгы җиде өстенлекле юнәлешне раслады.
Шулай итеп, педагогик юнәлештәге урта һөнәри белем бирү оешмаларын тәмамлаучыларның кимендә 75%-ын мәктәпләрдә һәм балалар бакчаларында эшләүнең беренче елы йомгаклары буенча беркетү бурычы үтәлде диярлек. Казан педагогика көллияте директоры Әнфисә Җәләлова уку йортын тәмамлаучылар арасында максатчан әзерлек юнәлеше буенча эшкә урнашуның 74% булуы турында хисап тотты. Кирәкле күрсәткечкә ирешергә матди ярдәм генә йогынты ясамый. Җәләлова билгеләп үткәнчә, бүгенге көндә педагогик әзерлек учреждениеләрендә һөнәри юнәлеш бирү эше көчәйтелгән.
Икенче бурыч – югары уку йортларын тәмамлаучыларның кимендә 75%ын «Рус теле», «Башлангыч сыйныфлар», «Математика», «Физика», «Химия», «Биология», «Тарих» белгечлекләре буенча максатчан рәвештә мәктәпләрдә эшкә әзерләү һәм беркетү.
Булачак педагогларга стипендия ярдәме программасы старт алган 2016 елдан башлап, 4 чыгарылыш агымы әзерләнде. Аларның 88%ы республиканың мәгариф учреждениеләренә эшкә урнаша. Мондый саннарны ТР Мәгариф һәм фән министрлыгының өстәмә һөнәри белем бирүне үстерү бүлеге башлыгы Роза Шәяхмәтова хәбәр итте. Әлеге программада катнашучылар ай саен 15 мең сум күләмендә стипендия ярдәме алалар һәм чыгарылыштан соң Мәгариф өлкәсендә 5 ел дәвамында эшләп, бурычны кире кайтаралар. Беренче (2021 елгы) чыгарылышның әлеге 5 елы киләсе елда тәмамлана.
Хезмәт хакы турында сорау элеккечә кала бирә –педагогларның ставкасы нинди булырга тиеш? Шәяхмәтова искәрткәнчә, 2025 елда Россиянең өч төбәгендә педагоглар хезмәтенә түләүнең яңа системасын сынау рәвешендә эшләтеп җибәрү планлаштырыла. Татарстан Республикасы андый төбәкләр исәбенә керми, әмма 2027 елга кадәр программа штат режимында эшләп китәргә мөмкин.
«Республика бу мәсьәләләрне грантлар аша матди ярдәм белән хәл итә», – дип сөйләде Шәяхмәтова.
Аерым алганда, сүз «Физматалгарыш» проекты турында бара, аның кысаларында республиканың 350 физика, математика һәм информатика укытучысы, эш тәҗрибәсенә һәм формасына карап, бер тапкыр 300, 240 яки 90 мең сум күләмендә акча алды.
«Педагогика белгечлеге буенча укырга кергән психология-педагогика сыйныфларын тәмамлаучылар өлешен 30% тан 35% ка кадәр арттыру» пункты буенча төгәл саннар юк.
«Хәзерге вакытта кабул итү кампаниясе алып барыла, әмма якынча 35% үтәячәгебезне чамалыйбыз», – дип саный Шәяхмәтова.
Бүгенге көндә Татарстанның мәгариф оешмаларында 543 психолог эшли, 54 урын – вакантлы. Шул ук вакытта Татарстан мәктәпләрендә 35,6 мең педагог эшли һәм 504,7 мең укучы белем ала. 958 мәктәптә укучылар һәм педагогик хезмәткәрләр өчен психологик-педагогик ярдәм күрсәтү хезмәткәрләре өчен ставкалар юк. 2025 елга мәктәп укытучылары һәм укучылары өчен психологик-педагогик ярдәм күрсәтүне тәэмин итү бурычы куелды.
«1 сентябрьдән педагог-психологлар өчен 306 өстәмә ставка барлыкка киләчәк, шуңа бәйле рәвештә колачлауны 36% тан ким дигәндә 80% ка кадәр арттыра алачакбыз. Хәзер без мәктәпләрдә булган ихтыяҗның 100%ын каплау мәсьәләсен карыйбыз», – дип сөйләде министрлыкның балаларга өстәмә белем бирү һәм укучыларга психологик ярдәм күрсәтүне үстерү идарәсе башлыгы Айгөл Кашапова.
Риск төркемендәге балаларның кимендә 90%ын өстәмә белем һәм мәшгульлек программалары белән тәэмин итү бурычы буенча Кашапова 75% булуы хакында хисап тотты.
«Быел Ватанны саклау куркынычсызлыгы нигезләре кабинетларын җиһазлау буенча зур эш башланды, шул ук вакытта хезмәт кабинетларын җиһазлау да бара», – дип сөйләде үзенең докладында ТР Мәгариф һәм фән министры урынбасары Рамил Хәйруллин. Быелгы бурыч буенча әлеге кабинетларны җиһазландыру күрсәткечләрен 32% тан 40% ка кадәр күтәрергә кирәк.
Анализ күрсәткәнчә, 878 мәктәптә бу кабинетларда тиешле җиһазлар юк. Быел 200 мәктәпне җиһазлауга 280 млн сум китәчәк. Алдагы 2 елда калган 678 мәктәпкә 2 миллиард сумнан артык акча бүлеп биреләчәк.
«40% тан арттырабыз, һичшиксез», – дип сүзен йомгаклады Хәйруллин.
2026 елдан музыка, рәсем сәнгате һәм физика кабинетларын комплекслы җиһазлау башланачак.
«Төрле категориядәге гражданнарны укыту максатларында Татарстан Республикасында кирәк булган кимендә 50 белем бирү программасын эшләү» бурычы буенча план шулай ук арттырып үтәлде. Һөнәри компетенцияләрне үстерү үзәге өстәмә һөнәри белем бирүнең 26 программасын, һөнәри белем бирүнең 54 программасын һәм гомуми үсеш программаларын эшләде. 2025 елның беренче яртыеллыгы йомгаклары буенча әлеге программалар буенча 303 кеше белем алган.
Узган утырышта куелган барлык бурычлар буенча нәтиҗәләр бертавыштан канәгатьләндерелде. Ләкин эш башкада, дип саный ТР Илкүләм ата-аналар ассоциациясенең төбәк бүлеге җаваплы сәркатибе Анатолий Венедиктов.
«Эш шунда ки, барлык бурычлар Мәгариф министрлыгының Иҗтимагый палата әгъзасын үз юнәлешендә алып бару мөмкинлегеннән чыгып куелды», – дип сөйләде ул «Татар-информ» хәбәрчесенә.
Иҗтимагый совет әгъзасы фикеренчә, мәгариф базасында киләчәк буыннарның үсүен аңлап бетермиләр.
«Бу акцентлар үзгәрмичә, кызганыч ки, куелган бурычларны үтәү хәзерге мәсьәләләрне генә хәл итәчәк», – дип сүзен йомгаклады Венедиктов.
Мәгариф өлкәсе буенча экспертлар республика мәгариф министрлыгы өчен максатларны тармакның реаль проблемаларын исәпкә алып формалаштыра, дип аңлатты корреспондентка ведомство каршындагы Иҗтимагый совет рәисе Асия Тимирясова.
«Сез бит бу сорауларның никадәр актуаль булуын күрәсез. Республика халкы мәгариф системасының сыйфатын яхшырту өчен ниләр эшләргә кирәклеген күрә. Еш кына министрлык ниндидер әйберләр белән эчтән таныш булмаска мөмкин. Монда ата-аналар берләшмәләренең, республикада яшәүчеләрнең фикере бик мөһим», – дип сөйләде ул.
Чыганакка сылтама: https://mon.tatarstan.ru/index.htm/news/2437442.htm
