16 сентябрьдә Казанда бөтен илдән йөздән артык иң яхшы педагог «Туган тел һәм туган әдәбият укытучысы — 2024» конкурсының йомгаклау сынауларында очрашачак.
Этномәдәни белем бирү өлкәсендә иң масштаблы һөнәри конкурс 16 сентябрьдә Идел буе физик культура, спорт һәм туризм университетында ачылачак. Ярышны оештыручы — Россия Мәгариф министрлыгы, оператор — Туган телләр институты.
«Безнең илдә талантлы туган тел укытучылары күп, һәм аларга камилләшү, тәҗрибә уртаклашу, киләчәктә иҗади һәм һөнәри үсеш өчен уңай шартлар тудыру мөһим. Конкурста катнашучылар нәкъ менә шундый мөмкинлекләр ала», - дип билгеләп үтте Туган телләр институты җитәкчесе Эсет Бокова.
Конкурс өченче тапкыр үткәрелә һәм Россия Федерациясендә 2022-2032 елларда җирле халыклар телләренең Халыкара унъеллыгын үткәрүнең әһәмиятле чарасы булып тора.
Һөнәри ярышның партнерлары ВТБ банкы, Россия халыклары Ассамблеясе, ДОМ.РФ банкы, «Белем» Россия җәмгыяте, «Грамота.ру» фәнни-белешмә порталы, «Россия халык сәнгать кәсепләре» Ассоциациясе һәм Россия хатын-кызлар берлеге булды.
Йомгаклау этабы ике турда узачак: «Методик остаханә» сынавы барышында педагоглар жюри һәм укытучылар бергәлегенә үзләренең һөнәри компетенцияләрен күрсәтәчәкләр, бу телне белмәгән укучылар өчен кереш туган тел дәресе үткәрәчәкләр, шулай ук укучылар белән дәрестән тыш чара оештырачаклар һәм «Мастер-класс»та үзләренең педагогик методикасының нәтиҗәлелеген күрсәтәчәкләр.
Җиңүчеләрне һәм призерларны бүләкләү тантанасы 21 сентябрьдә Казанда, ә Халыкара укытучылар көнендә Дәүләт Кремль сараенда узачак.
Тантананың онлайн-трансляциясен VK сайтында рәсми берләшмәдә карагыз.
