Татарстан Республикасы башкаласында яшь педагоглар өчен конкурсның гариза бирү кампаниясе старт алды. Җиңүчеләр һөнәри үсеш өчен 30 мең сум алачак. Тиешле карар муниципаль хокукый актларның челтәрле басмасында басылып чыкты.
Муниципаль гомуми белем бирү учреждениеләренең 35 яшькә кадәрге, кимендә бер ел педагогик стажы булган хезмәткәрләре катнаша ала. Шул ук вакытта узган елгы җиңүчеләрдән гаризалар кабул ителми.
Конкурс йомгаклары буенча жюри 50 кешене билгеләячәк, аларга өстәмә һөнәри белем бирү программалары буенча укырга, конференцияләрдә һәм укыту семинарларында (шул исәптән онлайн) катнашырга, методик әдәбият, үстерә торган мохит булдыру өчен җиһазлар яисә педагогик лаборатория өчен материаллар сатып алырга субсидия биреләчәк.
Конкурсның гариза бирү кампаниясе 1 сентябрьгә кадәр дәвам итәчәк. Катнашучыларга гариза, портфолио һәм мәгълүматларны эшкәртүгә ризалык белән архивланган папканы info@kazanobr.ru. электрон адресына җибәрергә кирәк. Рәсмиләштерү үрнәге сылтама буенча бастырылды. Конкурс нәтиҗәләре 26 сентябрьгә кадәр игълан ителәчәк.
Ярышны Казан шәһәре Башкарма комитетының мәгариф идарәсе үткәрә. Ул яшь педагогларның социаль статусын күтәрүгә, һөнәри үсеш, шәхес формалашу, белгечләрнең үз-үзләрен камилләштерү һәм гамәлгә ашыру өчен уңай шартлар тудыруга, шулай ук укытучы һөнәренең абруен күтәрүгә юнәлдерелгән.
Татарстан Республикасы Мәгариф һәм фән министрлыгы материаллары буенча
