«Россия – мөмкинлекләр иле» Президент платформасының «Мәгариф флагманнары» һөнәри конкурсында катнашуга гаризалар кабул итү төгәлләнде. Рәсми сайтта илнең барлык төбәкләреннән 88 меңнән артык кеше теркәлгән, шулардан 44 548 кеше шул ук исемдәге һөнәри конкурста катнашу өчен гариза биргән. Проект Россия Федерациясе Мәгариф министрлыгы ярдәмендә гамәлгә ашырыла.
«Мәгариф флагманнары» конкурсында белем бирү өлкәсендә мотивацияле идарә итүчеләр, 18 яшьтән өлкәнрәк булган талантлы педагоглар һәм барлык юнәлешләрдәге перспективалы студентлар, шулай ук белем бирү эшчәнлеген гамәлгә ашыручы эшмәкәрләр катнаша.
«Мәгариф флагманнары» проекты төбәкләр һәм муниципалитетлар өчен сыйфатлы кадрлар резервы булдырырга мөмкинлек бирә. Конкурста җиңүчеләр һәм катнашучылар өстенлекле тәртиптә белем бирү оешмаларында җитәкче вазифаларга карала. Катнашучылар составының үзәге – төрле төбәкләрдән талантлы һәм мотивацияле педагоглар. Педагогик югары уку йортлары студентларының да актив рәвештә катнашуга гаризалар җибәрүе сөендерә. Әйтик, М.Е. Евсевьева исемендәге Мордва дәүләт педагогика университетыннан 1500дән артык гариза килгән, гаризалар саны буенча икенче урында – дәүләт мәгариф университеты. Проектка Волгоград дәүләт социаль-педагогика университеты, Урал һәм Ульяновск педагогика университетлары студентлары актив кушылды», – диде РФ Мәгариф министры Сергей Кравцов.
«Мәгариф флагманнары» проекты мәгариф өлкәсендә иң талантлы һәм максатчан белгечләрне, шул исәптән идарә итүчеләрне, педагогларны һәм студентларны ачыклауга һәм аларга ярдәм итүгә юнәлдерелгән. Проектка теркәлүгә гаризалар саны буенча лидер төбәкләр арасында Саратов өлкәсе (4500дән артык катнашучы), Курск өлкәсе (3500дән артык катнашучы), Краснодар крае (3200дән артык катнашучы), Волгоград һәм Свердловск өлкәләре (3000нән артык катнашучы).
«Ел саен Россиянең 89 төбәгеннән дистәләгән мең кеше һөнәри һәм карьера үсешенә ихтыяҗ сизә һәм «Мәгариф флагманнары» бергәлегенең бер өлеше булып китә. Проект орбитасында дүрт сезон эчендә 318 меңнән артык катнашучы – мәгариф өлкәсендә идарә итүчеләр, укытучылар һәм студентлар. Быел иң күп гаризалар педагоглардан килгән – 57%. Теркәлү саныннан 28%ны студентлар, идарә итүчеләр – 15 % тәшкил итә. Проектның узган сезоннары финалистлары һәм җиңүчеләре мәгариф системасының барлык дәрәҗәләрендәге кадрлар резервына керде һәм үз экспертлыкларын исбатлаган профессионаллар буларак яңа билгеләнүләр ала», – дип сөйләде «Россия – мөмкинлекләр иле» коммерцияле булмаган автоном оешмасы генераль директорының беренче урынбасары Алексей Агафонов.
Конкурста шулай ук укытучылык стажы 50 елдан артык булган педагоглар да катнаша. Алар арасында Чечен Республикасыннан физика укытучысы Муса Мусисапов та бар. Аңа 83 яшь, ә эш стажы – 58 ел. Екатерина Апсова инде 53 ел Карачай-Черкес Республикасында балаларга химия укыта, быел аңа 78 яшь тулган. Ульяновск өлкәсеннән Валентина Проскурина мәгариф системасында 51 ел эшли һәм укучыларны математикага өйрәтә.
Мәгариф өлкәсендә идарәчеләр арасында иң тәҗрибәле катнашучы Луганск Халык Республикасын тәкъдим итә. Виктор Гардышка 78 яшь, ул Свердловск Кулинария осталыгы һәм хезмәт күрсәтү өлкәсе көллиятен җитәкли.
«Мәгариф флагманнары» проектының төп чараларыннан берсе – идарә итүчеләрнең, педагогларның һәм студентларның карьера үсешенә юнәлдерелгән шул ук исемдәге һөнәри конкурс.
2 августта конкурсның беренче этабы старт алды – профессиядән өстен компетенцияләр һәм һөнәри белемнәр дәрәҗәсен дистанцион комплекслы бәяләү, ул 11 августка кадәр дәвам итәчәк. Бәяләү нәтиҗәләре буенча Россия Федерациясенең һәр субъектында идарә итүчеләр һәм педагоглар арасында ярымфиналга чыгучылар рейтингы төзеләчәк, ә студентлар шунда ук октябрьдә узачак финалга чыгачак.
Идарә итүчеләр һәм педагоглар өчен төбәк ярымфиналлары көндезге формада октябрьдә узачак. Катнашучыларның һөнәри белемнәре һәм универсаль компетенцияләре дәрәҗәсен экспертлар аларның индивидуаль һәм төркемле конкурс биремнәрен үтәү барышында бәяләячәкләр. Конкурс финалына һәр төбәктә ярымфиналның өч җиңүчесе генә чыгачак. Финал үзе ноябрьдә узачак. Конкурста катнашучыларга үзләрен таныту, белемнәрен тикшерү, квалификацияләрен күтәрү, агарту чараларында катнашу һәм Россия Федерациясе мәгариф системасының кадрлар резервына керү мөмкинлеге биреләчәк.
«Россия – мөмкинлекләр иле» Президент платформасының «Мәгариф флагманнары» проекты Россия Федерациясе Мәгариф министрлыгы ярдәмендә «Мәгариф» милли проектының «Һәркем өчен социаль лифтлар» федераль проекты кысаларында гамәлгә ашырыла.
Татарстан Республикасы Мәгариф һәм фән министрлыгы материаллары буенча
